Skip to content
خیبر پختونخوا کابینہ نے صحت، تعلیم، پانی کی فراہمی، پبلک ہیلتھ، سیاحت، ماحولیات، صفائی، توانائی اور بجلی کے شعبوں میں عوامی فلاح و بہبود سے متعلق کئی اہم فیصلے کیے ہیں۔
سرکاری اعلامیے کے مطابق، کابینہ کا طویل اجلاس جمعہ کے روز وزیر اعلیٰ علی امین خان گنڈا پور کی صدارت میں منعقد ہوا، جس میں کابینہ ارکان، چیف سیکرٹری، ایڈیشنل چیف سیکرٹریز، سینئر ممبر بورڈ آف ریونیو، متعلقہ محکموں کے سیکرٹریز، اور ایڈووکیٹ جنرل خیبر پختونخوا نے شرکت کی۔
کابینہ نے ضم شدہ اضلاع میں مفت درسی کتب اور اسکول بیگز کی فراہمی کی اسکیم کے لیے 1 ارب روپے کی ضمنی گرانٹ (Supplementary Grant) کی منظوری دی، اور متعلقہ حکام کو ہدایت کی کہ وہ اسکول جانے والے تمام بچوں کے لیے اسکول بیگز کی فراہمی کی اسکیم تیار کریں، جس کا آغاز ان بچوں سے کیا جائے جو جاری داخلہ مہم کے دوران اسکول میں داخل کیے جا رہے ہیں۔
کابینہ نے بچوں کے لیے بنیادی تعلیم کی اہمیت پر زور دیتے ہوئے اس عزم کا اعادہ کیا کہ صوبے کے ہر بچے کو بنیادی تعلیمی سہولیات فراہم کی جائیں گی۔ اجلاس میں کہا گیا کہ ایک طرف درسی کتب کی بروقت طباعت کو یقینی بنایا جائے گا، تو دوسری طرف اس کے معیار کو بہتر بنانے کی بھی کوشش کی جائے گی۔ اس کے ساتھ ساتھ اخراجات کم کرنے اور محکمہ تعلیم کو واجب الادا رقم کی ترجیحی بنیادوں پر ادائیگی کے قابل بنانے کے اقدامات کیے جائیں گے۔
