لاہور بورڈ نے دستاویزات کی فوری تصدیق کے لیے کیو آر کوڈز متعارف کرانےکا اعلان

لاہور بورڈ آف انٹرمیڈیٹ اینڈ سیکنڈری ایجوکیشن (BISE) نے تعلیمی دستاویزات کی تصدیق کے عمل کو آسان بنانے کے لیے ایک نیا کیو آر کوڈ سسٹم متعارف کرایا ہے۔

اس اقدام کے تحت، BISE لاہور کے جاری کردہ تمام سرٹیفکیٹس، نتیجہ کارڈز، اور رول نمبر سلپس پر ایک منفرد کیو آر کوڈ شامل ہوگا۔ ان کوڈز کو اسکین کر کے دستاویزات کی فوری آن لائن تصدیق کی جا سکے گی، جس سے تعلیمی اداروں اور آجروں کے لیے دستاویزات کی اصلیت کی تصدیق کرنا آسان ہو جائے گا۔

یہ نظام جعلی ڈگریوں کے بڑھتے ہوئے مسئلے سے نمٹنے اور تیز تر اور زیادہ قابل اعتماد تصدیق کے عمل کو یقینی بنانے کے لیے بنایا گیا ہے۔

دوسری جانب، بورڈ آف انٹرمیڈیٹ ایجوکیشن کراچی (BIEK) 2024 کے انٹرمیڈیٹ امتحانات کے نتائج میں گڑبڑ کے تنازع کے بعد بحران کا شکار ہے۔ اس واقعے نے خاص طور پر پری میڈیکل اور پری انجینئرنگ کے طلباء میں شدید بے چینی پیدا کر دی ہے، جنہوں نے غیر متوقع طور پر کم نمبر آنے کی شکایت کی ہے۔

احتجاج شروع ہو چکے ہیں، اور بہت سے طلباء اپنے نتائج کے تفصیلی جائزے کا مطالبہ کر رہے ہیں۔

تنازع کے جواب میں، BIEK کے چیئرمین کو برطرف کر دیا گیا ہے۔ شرف علی شاہ، جو اس وقت بورڈ آف سیکنڈری ایجوکیشن کراچی (BSEK) کے چیئرمین ہیں، کو بحران سے نمٹنے اور امتحانی نظام پر اعتماد بحال کرنے کے لیے BIEK کے قائم مقام چیئرمین کے طور پر مقرر کیا گیا ہے۔